التعامل مع ضغوطات الحياة

في بعض الاحيان نمر بضغوطات حسيه ليست بالمعنى الحرفي التي لابد ان تتجسد على ارض الواقع , مرات الحياة تضغطك ومرات تضربك بكف على وجهك مو لازم يكون كف معنوي مجسد على ارض الواقع زي لما الي جنبك يضربك.

عشان تغير مودك و تحاول توسع الضيق الي بصدرك و تحاول تطلع لنفسك جناحات وتطير خيالياً نفس الكف الي فوق ,لازم تخلق لنفسك مود و جو وبيئة تهرب منها من واقعك لتعالج نفسك وتقويها عشان تواجه الحياة دي, وعشان تخلق هذا الجو لنفسك ممكن تسوي او تتبع التالي:

1|تحب نفسك وتحاول تتطيب خاطرها بكم كلمة حلوة وانك تتفهم الي هيا قاعدة تمر فيه

2| تسوي كوباية قهوة او شاهي وروح للمود الي يعجبك , تفتح كتاب وتتأملو زي حقين الانستا, او تتابع شروق الشمس او تسهر وتتفرج على القمر , السر هنا يكمن في الهدوء ايوه دور مكان هادئ تقدر تستخلي فيه بنفسك

3| راجع نفسك راجع قراراتك وراجع وضعك وفكر بالايام الجاية ايش حيسير وايش المفروض تعمله دي الايام حط لنفسك خطة

4|تأمل التأمل يصلح الي بداخلك ويفتح لك ابواب من الخير في تغير ذاتك , يخليك تلقى حلول لمشاكلك بدون ما تحس , تأمل في مخلوقات الله كيف ربي شكلها وخلقها بدقة والبشر كيف ربي اعطاهم العقل وكيف انو كل انسان مميز بذاته واسلوبة غير في التعامل وردات فعلة غير فكر ليش و كيف كانت ردت فعلة و ايش الاسباب الخفية الي خلته يعمل كذا “مشاكل عائلية مشاكل في الطفولة ,ضغوطات ,حب ,عاطفة ,تهاون استخفاف “تأمل العماير البنايات الي حولك كيف قدر الانسان يبني ويوصل لهذا الطول كيف قدر توصل وفهم ان التراب والحجر ممكن يبني هذا البناء ويخليه ثابت , كيف ربي رفع السماء بلا عمد و كيف السحب تتشكل بالاشكال الجميلة هذي وتمشي وتتنقل من مكان لمكان بنفس الكتلة بدون ما تفرقها الرياح التي تنقلها , التأمل علاج للروح قبل الجسد.

5| ازرع الابتسامة بوجه احد , سوي شئ حسن ومرا شخص محتاجه وشوف كيف يبتسم عشانك عملتوا , صدقة او حتى تساعد بتنظيف البيت او مثلاً تسوي حاجة خارجة عن المألوف لشخص الي تحبه وتخليه سعيد ومبتسم لانك عملته عشانه .

6|ابحث عن شئ يفرحك ويصنع يومك,تشوفه تشمه تحس بيه بداية صباحك ويسعدك لباقي اليوم , صراحة كنت امر بفترة قريبه لتكون اكتئاب بس لقيت ابتسامة شخص تصنع يومي اعتدت كل صباح اشوف الابتسامة واصير نشيطه وسعيده لباقي يومي , صح انو بعد اسبوعين او ثلاثة اختفى هذا الشخص بس عدل من نفسيتي وله فضل كبير .

7|كل يوم حط عبارة تشجعك عشان تكمل شغلك الي ضاغطك وخليها على الجدار حق غرفتك , كل يوم حتشوفها وتنتبه للشغلك , زي مرا كتبت تهديد “انتبهي من الحرمان ” كل ما اشوفها افتكر اني تعديت نسبة غيابي في كل مواد الترم واضطر اداوم بجنبها عبارات تلطيفيه لان التهديد ما يمشي البني ادم على السراط المستقيم لازم يعاند ,كانت عبارات مثثل ” انتي تقدري تكوني الاول و العظيم “”المحاولة تعتبر نجاح بحد ذاتها ” ” طالما تحاولين معناتها انتي ناجحة الاستسلام هوا الفشل ”

8|لا تعطي نفسك كلام سلبي او تقارن نفسك بالاخرين وتجلس تحاول توصل لمستواه , انت مو داري كيف انت بجوانب اخرى متعديه بمئة مرا , وهو اقل منك فيها ,مو لما تشوف جانب واحد حلو وفنان فيه معناتها هو شخص جيد واحسن منك , انت بس شفت جانب واحد ,شخبار باقي الجوانب ؟ اكيد ما تلقى لو جانب واحد انت احسن فيه منو.  يوم تقارن نفسك وتحاول تصير احسن منو وما تقدر صدقني انت الي بيستسلم و يوقف ويبطل يشتغل على الجانب نفسه الي كان شغال عليه زمان , الانسان يطور جميع الجوانب والمهارات الي عندو بس بنسب متفاوته عشان كذا . المقارنة موت لشخصيتك وابداعك .

9|فترة الضغط حط جدول للاسبوع وقسم وقتك و حط قائمة بالشغل الي راح تعملوا اليوم و كل ما تنجز حط قدامها صح عشان تشجع نفسك تكمل اليوم وتحس انك جالس تنجز وسط الضغط , لازم تكون قائمة اليوم معقولة و محدده بالوقت وكل شغلة تحط في بالك كم ساعة بتجلس تعملها .

10|دور لك موهبه جددة تخطط تنميها بعد فترة الضغط , يعني فكر بشيء جديد راح تعملوا بعد مرور فترة الضغط بخير , لانك بعد الضغط حتلقى نفسك فاضي لدرجة مو داري ايش تعمل , وكمانه لا تنسى المكافئة بعد الضغط لازم تكافئ نفسك  بأي شيء تحبو المكافئة تلعب دور بتحسين المود و تخليك تنجز عشانك عارف في مكافئة بالنهاية.

كل د الامور لازم تطبقها وتختلف درجات تطبيقها من شخص لاخر وكل واحد له اسلوبه الخاص في اتباعها وممكن حتى تكون اكثر من دي.

شكراً للعيون الجميلة الي تقرأ المدونة يالبا .