تجربتي | السنة التحضيري بجامعة الملك عبدالعزيز

السلام عليكم ورحمة الله

كيفكم ان شاء الله بخير

صراحه من فترة طويلة ما كتبت شئ 😂 فا قررت ارجع و بقوة بعد اهم سنتين بالنسبه لي و جايه السنة الثالثه المهمه الي بتحدد لي ميولي و تحدد استمراريتي بالتخصص ...

على العموم حبيت اليوم اتكلم لكم عن تجربتي ك طالبة سنة تحضيري علمي في جامعة الملك عبدالعزيز 💕

طيب حبدأ اول حاجه ب سنة ثالث ثانوي على الخفيف لانها هيا منطلق الاجتهاد الشخصي لبلوغ هدف 12 سنه و هو دخول الجامعه ، زي ما انتو عارفين انو لازم نختبر اختبار قدرات و تحصيلي ، وكثير سمعنا من ناس تقول عنو حظ وانو مايحتاج له مذاكره لانو حتى لو ذاكرت حتجيب درجة سيئه وهذا الكلام اكيد مليون بالميه غلط ، انا صراحه وقعت بفخهم هيهيهي، وقولت خلاص اول اختبار بروحو استكشاف بدون مذاكره وهذا غلط لاني خرجت من الاختبار وانا مو مستوعبه مستوى الاسئلة واسلوبها و لا عشت التجربه السليمه الي المفروض نجربها واحنا مذاكرين عشان بكرا نتفادى اخطاء مذاكرتنا .

طيب بعدها الحمدلله فتحت مخي و فتحت على التجميعات وذاكرت من موقع قياس نفسه و من قناة الاستاذ فهد على اليوتيوب هنا قناته ، هذي الي فادتني صراحه مع انو ذاكرت من كتاب قدرات بس ما لاحظت اي نتيجه غير انو فهمت الاساسيات والي شرحها الدكتور بقناتو .

نجي للتحصيلي صراحه سويت غلطه بسيطه ضيعت علي وقت والي هيا رجعت اقرأ كتب ثاني و ثالث ثانوي العلميه الي داخله بالاختبار بشكل سريع و بس اركز على الاهداف و الفكرة الرئيسية ودا ضيع يوم كامل واحسني ما استفدت منو زي التجميعات ، التجميعات تنقذك و تسعفك في الوقت الضيق لا سيما ان التحصيلي قبل الاختبارات النهائية بأيام قليلة ...

الحمدلله خلصت الثانوي على خير وجاء وقت التقديم للجامعه ، صراحه الاجازة ذيك كانت اطول اجازة عشتها ، احسني مشغوله واعصابي مشدوده ومو قادره اركز بإجازتي واستمتع ، نجي للتسجيل والتأكيد و اعلان النتائج والحمدلله كنت من ضمن اول فرز و انقبلت بالجامعه ، بادرة من بوادر الحلم وتحققت .

قبل ما احكيكم عن اول يوم بالجامعه بتكلم عن الانجليزي ، اخ منه الانجليزي .

محدثتكم أريج أبد أبد ما تأسست صح المتوسط اهمال صراحة مني بس الثانوي وقت الجد اهمال من الاستاذه بس بالنهاية تعلم الانجليزي يعتمد عليك انت حتى ولو جابو لك أفضل المدرسين بالدنيا ...

فا بعد القبول يحددو لك يوم تختبري فيه انجليزي تحديد مستوى يشوفو مستواك وبعدها ينزلو لك الفل المناسب لك من أربع لفلات ، طبعاً يمديك تعادلي الانجليزي ولا تدرسيه أبداً عن طريق شهادة توفل و ايليتس تقدميها لمعهد الانجليزي بدرجة يحددوها هما لكل من الاختبارين .

انا ما فكرت أجرب و أخذ وحده من الشهادتين لأني عارفه نفسي و أدري بمستواي ، وقبل الاختبار بأسبوع قريت كلام شخص يقول انو اعتبر الانجليزي بالجامعه زي المعهد المجاني لك مدفوع تكاليفه وتدرس و تتأسس صح و منها ترفع معدلك ، "دا الكلام غلط غلط غلط" بسببو ما ذاكرت و رحت على عماي و اخذت من لفل 1 ..

طبعاً راح تستلمو بطايق الجامعه بنفس يوم اختبار تحديد المستوى ...

نجي لأول يوم دوام ، كان شعور جميل من خوف وحماس و كمان شوفة صحباتي ...

صراحه كنت شايله هم اني اضيع و بأول اسبوع جلست ادوى القاعات و والجوال بيدي وعلى تطبيق الجامعه عشان اشوف رقم الكلاس وبأي دور الخ..

كان أول يومين الكل يمشي وبيدو جواله وفاتح التطبيق و يدور والكل ضايع مشهد حلو تحسي بالانتماء طبعا بعد أول اسبوع استقرينا على نفس القاعات و خلاص حفظنا الاوقات ..

طيب الخطة الدراسية تنقسم الى قسمين "أ" و "ب" كل ترم تأخذي خطة انا أول ترم بدأت بخطة ألف و هي الخطة الدسمه فيها 5 مواد الي هم رياضيات و فيزياء و مهارات اتصال و حاسب وكمان الانجليزي ...

طبعا الخطة دي فيها مواد كثيره بس الميزه الحلوه فيها انو مهارات الاتصال و الحاسب بالعربي و عندك بس فيزياء و رياضيات حتكون بالانجليزي ، فا انا كنت اشوف ذا الشئ بصالحي مرا رغم انو صحباتي كلهم بدأو خطة ب وكانوا راحميني انو مكروفه وما عندي أوف شاطح زيهم ومواد اكثر ، بعض الايام تمر علي ما اشوفهم غير الصباح في الباص وحتى مو دايم ، في البداية نفسيتي تعبت انو لحالي و ما اكلم احد ولا اقابل صحباتي الا بريك الصلاة و بعض الاحيان ما اقابلهم خير شر ، فا لا تقلقو في البداية حيجيكم دا الشعور بذات لو انتو متعودين حولكم اصحابكم 24 ساعه زيي 😂....

طيب نجي للمهم الدراسة ، طبعاً انا في بداية الترم ما اعرف شئ عن المدرسين الخصوصيين أبداً ، وذاكرت دي المواد بمساعدة المساند في بعض الاحيان ، و قبل الاختبار افتح التجميعات وهكذا ..." حتكلم بالتفصيل الممل لمذاكرة كل ماده وايش الي فادني في تدوينه اخرى"

مر الترم على خير و لما بدأت خطة ب اتدلعت من ناحية الوقت ثلاث أيام اخرج 12 الظهر و يومين بس اخرج 3 بس طبعا اليومين دي دسمه دسمه حد النخاع ، كنت اخذ كيمياء ساعه و نص و احياء ساعه ونص وبعدها جلد انجليزي 4 ساعات ، حتكلم عن نظام الانجليزي في أخر شئ ...

طبعا خطة ب موادها اقل و أجمل كيمياء و احياء و انجليزي واحصاء ....

طبعاً انتشرو الدكاتره الخصوصيين بسرعه وبعضهم دخلو وهم ما شافو نفسهم اذا يقدرو يعتمدو على نفسهم او لا ....

طيب جاء الوقت الي اتكلم فيه عن الدكاتره الخصوصيين ، دولا يرجعو يشرحو نفس شرح الاساتذه بس يعطوكم اسئلة ويقولو ذي اسئلة الاختبار طبعاً الاسئلة يجيبوها من التسريبات و اسئلة المساند والاختبارات التجريبية على البلاك بورد ....

صراحة انا أشوف اول شئ تحاولي تسيطري على الوضع تجربي تذاكري من نفسك و وحددي لكي جدول تذاكري يومين او في ايام الويكيند على حسب نظام كل شخص ....

صراحه شفت كثير دخلو قبل ما نبدأ المناهج ولا بعد يقولو لي ادخل لانو عليه مدح هذا غير انهم ياخذو 750 وفوق لترم كامل مقسمه على كل دوري ومكافأتك تطير عليهم '!.

طيب أخيراً حتكلم عن الانجليزي عبارة عن 4 لفلات و كل لفل ياخذ شهر ونص تقريباً و كل يوم 4 ساعات بالبريكات ما بين كل ساعه بس طبعا راح يلغو لكم البريك ابو 10 دقايق و يصير ثلاث ساعات و نص ...

اول لفل ما راح ينحسب في المعدل يعني مهما جبتي درجة حلوه فيه ماراح تنحسب الدرجة في معدلك ، فا الافضل تتخطو الفل عن طريق اختبار تحديد المستوى...

طيب بتكلم عن الانجليزي بشكل عام من لفل 1 الى 4 :-

اول شئ اكذب لو قولت ما استفدت شئ بعض الفلات خرجت منها وانا فاهمه و احسني اكتسبت كلمات جديده وتطورت لغتي شوي ، بس الي ابغا اقولو لكم كل اللفلات دي تعلمكم الاساسيات وتبنيكم صح على حسب الاستاذه وعلى حسب اشتهادك انتي وانو من جد تبغي تكسبي لغه وتتعلمي ، طبعا حتجيكم ايام ودكم تسحبو و ودكم تجلسو مع صحباتكم بس لازم تقاومو الرغبة الملحه دي و تحافظو على حضوركم و تداومو لانو بعض الاستاذات يحفظو الوجيه و يساعدوكم وقت الاختبارات ...

أخيراً تكلمت عن التجربه بشكل عام وبنزل تدوينة ثانيه وحتكون عن المواد بس وكيفية مذاكرتها والمراجع وكلو ان شاء الله 💜 .

حبايبي الي حأختم فيه الموضوع نصيحه كنت محتاجه احد يقولها لي ، أنت قوية وانت تقدري توصلي لحلمك مهما كان بعيد وصعب ، ما بين ألاف البنات تقدري تدخلي التخصص الي تبغيه و تحققي باقي احلامك ، عزيزتي استشعري الجمال و الحياة الحلوه السعيده وانتي رايحه و راجعه من الدوام أخلقي لكي جو و غيري نفسيتك لو احتاج الموضوع كوب قهوة ، ضاق خلقك وحسيتي نفسك حتفقدي السيطره اجتمعي مع صحباتك بالجامعه ودللي نفسك بالاكل ، منجد لا تبخلي على نفسك و لا تروحي وترجعي بمود مكروف و تعبان ولا تستسلمي ، وتذكري انت تقدري تتحكمي في مزاجك مهما كان ، كلاسات الظهر طويلة و تطفش اهرجي مع الاستاذه واضحكي ، خارجي نفسك وعيشي يومك وجوك ولا تنكدي على نفسك عشان الجامعه او المذاكره بس تذكري دايم هيا سنه مصيريه و تحددي مستقبلك فيها 💜.