المواد العلميه في التحضيري وكيف ذاكرتها

-

بسم الله الرحمن الرحيم
في هذي التدوينة حتكلم عن كل ماده و مصادرها ومذاكرتها كيف حتكون ....
طبعاً المذاكره تختلف من شخص لأخر عشان كذا بالنهاية حأعطيكم بعض النصائح المهمة ...

-------💜💡-------




الانجليزي 

الماده دي الكلام ما يخلص فيها , اول شئ راح تختبرو اختبار تحديد مستوى شدو حيلكم فيه وذاكرو له كويس ,وبعدها راح يشوفو  مستواك و ينزلو لك الفل المناسب لك من أربع لفلات ، طبعاً يمديك تعادلي الانجليزي ولا تدرسيه أبداً عن طريق شهادة توفل و ايليتس تقدميها لمعهد الانجليزي بدرجة يحددوها هما لكل من الاختبارين .كل لفل ياخذ شهر ونص تقريباً و كل يوم 4 ساعات بالبريكات ما بين كل ساعه و بدون البريك ابو 10 دقايق و يصير ثلاث ساعات و نص ...
اول لفل ما راح ينحسب في المعدل , عشان كذا ذاكرو لاختبار تحديد المستوى .

-------💜💡-------

خطة 《أ》



مهارات الاتصال

المصدر الوحيد والأهم الكتاب ، تقدرو تشتروه من مكتبة الجامعه او مستعمل من البنات ، تذاكري كل حرف فيلو تفهميها كويس و تحفظي التعريفات و التعداد وكمان تذاكري بفهم المحتوى تحت كل عنوان لأنو مهم ، وقت الاختبارات انتشرت ملخصات اعتبريها 
كمراجعه لانو فيها اخطاء .



الحاسب 

نفس منهج الثانوي بس اخف ، حيكون فيه 4 دوريات عملي و واحد نظري نهائي ، المذاكره من الكتاب و تطبقي على الابتوب على طول عشان تنرسخ الفكرة براسك ، ولازم تحضري كل المحاضرات لانها مهمه وممكن الاستاذه تنبهك على الاخطاء الشائعة البنات بيسووها كل دوري ، النظري لازم تركزي على كل فصل وتعطي كل فصل حقو "ابد محد ركز على فصل واحد والباقي مر عليه مرور الكرام وانكب".



الفيزياء 

يتكلم عن تحويل الوحدات السرعه والتسارع و قوانين نيوتين و عن تحول الطاقة ، اول حاجه انا اشتريت الكتاب على الفاضي ما استفدت منو ، ذاكرت من سلايدات الاستاذه ، كانت على موقعها أروى البار ، طيب المذاكره من السلايدات بفهم و القوانين فهم وحفظ ' ، في نماذج و تست بانك و اختبارات السنين الي فاتت بموقع استاذة اروى البار تمري عليها واهم شئ تركزي على البلاك بورد واختبارته التجريبية الي في المساند او الي تنزلها لك استاذتك ...



الرياضيات 

رياضيات التحضيري اخف واجمل من الثانوي ، يتكلم عن النهايات و عن الدوال بشكل عام و الدوال المثلثية الي هيا sin و خواتها بس بشكل سهل و ممتع ، المذاكره الاساسيه من الكتاب لازم تذاكري الامثلة والتمارين الي تحلها الاستاذه و الواجبات ، تمري على الورك شيت مرا مهم يلخص الدرس و يجيب لك انواع و حالات لنفس المسألة يفتح عقلك و تستوعبي مرا مهم ، وبعدها عندك الاختبارات والنماذج والتمارين على البلاك بورد ان كانت استاذتك منزلتها او المساند ، دخول الاختبار بدون ألة حاسبه بس لا تخافو االارقام بسيطه و العمليات بسيطه ما تحتاج ألة حاسبه فعلاً .

-------💜💡-------

خطة 《ب》



احصاء 

لا تشيلو همه ، يتكلم عن انواع الاحصاء و اشكاله وكيفية جمع و ترتيب البيانات و توزيعها واشكال ترتيب البيانات رسومات جداول ورسم شجري وغيرها وطبعا ما ننسى الوسط والوسيط والمنوال الحب 😍💜 وينتهي بالتوزيع الطبيعي ، مذاكرته من السلايد والكتاب ، الي يعجبك بس الكتاب أشمل وفيه اشياء ما انذكرت في السلايدات ، تذاكري الامثلة وتركزي على طريقة الاسئلة و المعطيات و المطلوب ، طبعا الدوري الاول كان جزء منو نظري فا غلط كبير تحفظيه لاء افهميه و اربطيه بطريقتك وافهمي الامثلة عليه وكوني ملمه فيه ، طيب لازم تشوفي المساند في البلاك بورد زي ما اتفقنا الاختبارات التجريبية التمارين و التست بانك لو موجود .



الكيمياء

لا تخافو منه تراه أسهل من حق الثانوي بكثيييير ، حيتكلم عن الكيمياء وتعريفها وعن حالات المواد و عن مقياس الذره المول وحيتكلم عن تحويل من وحده الى وحده اخرى وعن الجدول الدوري وعن النواه ومستويات الطاقة فيها وكيفية توزيع الالكترون و عن الالكانات واشياء كثير جميلة ، المذاكره الاساسيه من السلايدات ، انصح بسلايد هدى الغامدي ولكن اول ثلاث شباتر فا سلايدات نهى افضل بالشرح والتوضيح ، بعد السلايدات عندك التست بانك مهم يخليك تتمرني على الاسئلة و الاختبارات التجريبية على المساند والتمارين .



الاحياء 

سهل وخفيف والحلو فيها ، الاختبارات حقت الدوري ما تدخل في النهائي ، يتكلم عن الخلية و هرم الحياة و خصائص الكائنات الحية والاعضاء واجهزة الجسم و الكيمياء الحيوية والوراثة ،المذاكره من سلايدات الجامعه، الاحياء يحتاج تركيز وروقان و تذاكريه أول بأول ، هو سهل و فيه خرائط ذهنيه منزلتها مس مرام  ممكن تفيدكم اذا تبغوها كمصدر خارجي ، و صراحه أحسن دكتور في الاحياء طلحه ، في تسريبات و اسئلة نازلة على البلاك بورد تبع الاستاذه ، طبعا مو كل الصور داخله معاكم حتنزل الاستاذه الصور الي داخله معاكم . 

#الأحياء ١١٠ مع مس مرام
قناتها على التلقرام

-------💜💡-------


الحمدلله خلصت كل المواد ، ...

طيب راح اقولكم على نصايح كذا بسيطه طبقتها وفادتني بالتحضيري :

 
  • لازم تذاكرو أول بأول لازم لازم طبعاً حددي لك جدول ، الفائده من المذاكره دي حترجمي الكلمات الي مو فاهمتها راح تحددي نقاط ما فهمتيها وترجعي للأستاذه وتشرحها لك ..
  •  قبل الدوري بأسبوع لازم تبدأي تذاكري مذاكره جديده وحقيقيه للدوري ، قولت حقيقيه ومعناتها تجلسي بتركيز كأنو الامتحان بكرا مو زي المذاكره اليوميه تبع الترجمة .
  •  أختار لك مكان تذاكري فيه وحاولي تخلقي لك جو لطيف وكل شئ جنبك من مويا و دفاتر واقلام .
  •  دائماً وأبداً روقي قبل لا تذاكري كلي اشبعي واجلسي شويتين بعدين ذاكري بجد .
  • قسمي مذاكرتك على اجزاء واحسبي التست بانك وحل الاختبارات التجريبية منها ، مثال للتوضيح : بيومين راح اخلص الرياضيات ، اليوم بذاكر من الكتاب واخلصو وبكرا راح اذاكر الورك شيت وادخل البلاك بورد واحل اسئلة . طبعاً لازم تخصصو يوم للأسئلة لانها شوي كثيره 

وأخيراً تذكرو الانجليزي مو عاق أبداً عشان تجيبي درجات عاليه و الرياضيات مو صعب بدون ألة حاسبة.

موقع انعمل خصيصاً لكم دفعة #تحضري19
https://kauguide.wixsite.com/preparatoryyear

تعليقات

إرسال تعليق

المشاركات الشائعة من هذه المدونة